حالة من الغليان تسود الشارع الكروي المصري بعد هزيمة النادي الاهلي بخماسية أمام صن داونز الجنوب افريقي في بطولة دوري ابطال افريقيا في دوري المجموعات حيث اختلفت الاراء حول السبب وراء هذه النتيجة المخيبه للامال فيري البعض انها مسئولية المدير الفني كولر ويري البعض الاخر انها مسئولية اللاعبين ويري فريق اخر انها مسئولية مجلس ادارة النادي الاهلي وهناك من يري ان جميع هذه العناصر مجتمعة هي السبب الرئيسي وراء انخفاض المستوى الفني للاعبو النادي الاهلي في الفترة الاخيرة
حيث صرح شيخ المدربين الكابتن طه اسماعيل نجم النادي الاهلي السابق : أن صن داونز كان افضل من الاهلي في كل حاجة والاهلي بدأ البطولة منذ البداية بشكل غير جيد واضاف الشيخ طه ايضا ان ما حدث اليوم يرجع الي الفارق الكبير بين عقلية لاعبو صن داونز ولاعبو النادي الاهلي
كما صرح احمد حسام ميدو نجم نادي الزمالك السابق قائلا : رأيي بصراحة ان فرقة الاهلي وحشة جدا .. فيه لاعيبة بيزعقو بس على الفاضي والمليان انما كورة مفيش حاجة خالص .. لاعيبة اتعودت انها مهما كانت وحشة اللجان هتحميهم وهتسيطهم . حديث الشناوي عن توقيت المباراة والملعب بيبينلك الحالة الذهنية للاعبين قبل المباراة
واضاف ميدو : اي حد بيقول ان الاهلي مش محتاج حارس بيجامل قولا واحدا الشناوي يتحمل مسئولية هدفين في مباراة الاهلي وصن داونز
اما الكابتن محمود ابو الدهب مدافع النادي الاهلي السابق قال : محمد عبد المنعم مدافع الاهلي فاكر نفسه راموس وقفشة مش بيضيف ونازل يلعب مع صن داونز
اما بالنسبة للكابتن رضا عبد العال نجم نادي الاهلي والزمالك السابق قال : كولر مدرب شخصيته ضعيفة وبيلعب بالبركة والادارة متلومش غير نفسها علشان اتعاقدت مع مدرب ضعيف واضاف ايضا عبد العال : كولر مدرب معندوش فكره وصن داونز لو داس كان كسب تسعة النهاردة
اما الاعلامي ابراهيم فايق صرح قائلا : ده مش الاهلي ولا دي لاعيبة النادي الاهلي واللي حصل ده مش اللي يستحقه جماهير النادي الاهلي واضاف قائلا : مينفعش يشيل كولربس الليلة طالما مجبتش له الصفقات اللي هو عايزها
واضاف فايق : بيرسي تاو وحده والباقي لم يسافر الي جنوب افريقيا دفاع ووسط الاهلي كان مهلهل واستمر في ارتكاب الاخطاء فيما اهدرت المجموعة الهجومية الفرص المتاحة للتسجيل
اما الكابتن نادر السيد حارس مرمي النادي الاهلي والزمالك السابق صرح قائلا : محمد الشناوي بحاجة الي الراحة والاستعانة بعلي لطفي ومصطفي شوبير مثلما هو الحال في نادي الزمالك بين محمد عواد ومحمد صبحي
اما وائل جمعة صخرة دفاع النادي الاهلي السابق قال : كنت اتمني ان تنتهي المباراة قبل وقتها المنظر اللي شوفناه النهاردة صعب جدا ولا يوجد مبرر للخسارة مش اول مرة نلعب في افريقيا ومش اول مرة نلعب الساعة 3 ومش اول مرة بنلعب تحت ضغط الادارة مسئولة واللاعبين والجهاز الفني الموقف اصبح معقد بسبب ظهور الفريق بشكل سيء الفريق افتقد التركيز والاعتناء وتحمل المسئولية للاسف اداء ونتيجة مخزية للاهلي
اما بالنسبة للكابتن علاء ميهوب نجم النادي الاهلي السابق فكان صاحب اعنف التصريحات حيث قال : اللي حصل النهاردة اهانة للنادي الاهلي واللي يزعل يزعل ده الحمد لله اني مكنتش في الموقف ده كان ممكن يحصلي حاجة في الملعب اصغر مشجع اهلاوي حاسس باهانة ازاي اقبل علي نفسي يجي فيا جول والتاني والتالت وحالة استسلام من اللاعبين
واضاف ميهوب : ده شكل لاعبية حاسة انها عملت مصيبة ؟ اللاعب لازم يكون عارف انه عمل يوم زفت في تاريخ النادي لازم يعرفوا ايه هي قيمة الاهلي واللي عايز يمشي يمشي انا عايز راجل في الاهلي مش لاعيب كورة حريف كورة مش هيلزمني انت قبل الاهلي ولا حاجة
وصرح الكاتب الصحفي والناقد الرياضي حسن المستكاوي قائلا : لا يستحق الاهلي الفوز علي صن داونز هناك اخطاء دفاعية متكررة وبطء ونقص لياقة وفارق سرعات وكل لاعب في صن داونز يجري بالكرة ويضع لاعب من النادي الاهلي في ضهره هي اخطاء فريق قبل ان تكون خطأ لاعب
اما الاعلامي الكبير الكابتن احمد شوبير صرح قائلا : ليس هناك افضل من الصراحة . نساند ونؤيد في الصح ولابد من المواجهة عند الخطأ . اذا كان كولر واللاعبين يتحملون جزءا كبيرا من هزيمة الاهلي القاسية اليوم فالاكيد الجزء الاكبر والاخطر يقع علي الادارة برئاسة الكابتن محمود الخطيب
واضاف شوبير أن هناك ملفات كثيرة لابد من مواجهتها وقيام كل مسئول بدوره الكامل حيالها والاعتذار للجماهير حال اي فشل فيها . من بين هذه الملفات ملف المحترفين وماذا قدموا للاهلي في السنوات الاخيرة وملف فقدان الدوري المحلي موسمين متتاليين وملف الهزائم القارية الكارثية المتكررة .. الجرح لازم ينضف